當年今日
關於我們

701收料站:永恩憧憬炒業績

蘋果日報 2004/04/13 00:00


復活節假期結束,芬佬及炒家應該全部歸位,小初問經紀黃有乜嘢好介紹?經紀黃推介鞋股永恩國際(210),佢話永恩今年累積升幅唔細,但仍有不俗上升潛力,隻股將於下周一公布全年業績,據講盤數應該好靚,股價可能高處未算高。
永恩舊年9月公布中期業績,盈利勁升10倍至2069萬元,但當時股價未有反應,直到舊年12月左右,先至有人當係寶,密密咁買入,結果股價由0.30元樓下,炒到上去最高接近0.70元水平,上周四升5.3%,收0.59元。
由於隻股向來有人睇住,小初當時以為只係人為炒作,一直都冇太留意,後來經紀黃收到料,話有機構投資者睇中永恩,睇好佢在大陸嘅零售業務前景。
永恩在多年前,以自己嘅品牌開拓大陸中低檔女裝鞋市場,至今銷售點有成千幾二千個咁多,呢類在國內擁有龐大銷售網絡嘅零售股,特別啱外資芬佬胃口,因此今次永恩公布全年業績,如果盤數真係見得人,估計股價重有得去。
慕容小初