新地代理執行董事雷霆同副總經理陳秀賢,今日請傳媒出席沙灘結婚派對。大家唔好誤會,唔係佢兩個結婚。佢哋為六對新人做主禮嘉賓。
呢個號稱全港首個私人沙灘結婚派對,點解會係由新地出面搞呢?答案係舉行地點大嶼山藍鯨灣沙灘,係新地擁有,所以新地就講明活動主題係「情訂藍鯨灣」嘞。當日新地重會介紹藍鯨灣各項休閒設施,同埋馬灣珀麗灣第三期嘅最新情況。
蘭西記得當日新地講過,藍鯨灣係畀珀麗灣業主專用,即係話新人係珀麗灣業主啦!聽講總共有六對愛侶一齊行婚禮,場面相信會好熱鬧。
另外,新地話今日可能會搞水上活動,喺咁嘅天氣之下,唔知邊個會落水表演呢?
傳媒關心新地樓盤多過個婚禮,到時大家爭住問發展商嘢,希望唔會破壞氣氛啦。
吳崇武剪綵一日走三場
美聯噚日一連開三間分行,包括上水中心、粉嶺名都廣場,而重頭戲就係睇準西鐵通車開設嘅屯門卓爾廣場分行。噚日美聯請咗華懋吳崇武做嘉賓,為三間新舖剪綵。
華懋喺粉嶺同上水都有樓賣,吳崇武出席一啲都唔奇,至於屯門卓爾居分行,原來佢一心以為老友新地周國賢會到場,可以敍吓舊,點知最後見唔到,難怪佢好風趣咁話自己被騙。