煲呔以為講一句「愛香港」定「愛民望」，就可以為林D9升官發財做CS開脫。咁特首跑馬仔呢？如果今日問七百幾萬根本冇得投票嘅香港人要唐唐定要CY？其實等於問我哋愛暴動定愛移民。呢樣嘢，睇怕連振英哥都有同感。
八方收到風，振英哥同唐唐近月都有接觸過80後，大談施政理念。振英哥閉門會見其中一個青年智庫組織時，除咗分享自己嘅施政理念，仲曾經向80後講笑咁話，如果大家想見到暴動，就應該選擇另一個候選人（即係唐英年啦）。八方即時諗起，曾經有政界人士講過，如果振英哥做到特首，佢就會即刻移民。香港人冇得投票，遲啲唔係要面對暴動就係要諗辦法移民，真係悲哀！

梁營：唔好老屈

八方聽見振英哥閉門嗰陣就咁勇猛攻擊對手，於是向梁營求證吓啦，點知梁營發言人澄清話：「呢句說話絕對唔係梁生講嘅。」叫人唔好老屈喎。其實梁營又唔使咁躁。
八方聽聞，有分別閉門見過唐、梁兩人嘅年輕人，賽後總結都認為，如果有普選，振英哥一定大勝唐唐，皆因振英哥不但熟書，講政策時亦有自己諗法，唔似唐唐，連推銷售稅都可以當成係自己嘅政績，話證明自己唔怕民意反彈，敢於推銷政策喎，令大家聽完一輪，唔知佢想講乜，認真大智若愚。但問題係，當你手中冇票，就講乜都係假。

羅范自詡好純情

CY咁緊張形象都係好正常，事關佢嘅選舉工程啟動得比勁敵唐唐快，而且好成功到唔少人支持，好似前教育統籌局常秘羅范椒芬咁，噚日就喺電台節目中暗挺CY，大讚佢有不被勸退嘅精神，話如果佢堅持參選，喺歷史上已經贏咗；但一講到唐唐，羅范就收口，話自己已經離開政府四年，不能評論唐唐嘅政績同表現。
羅范仲自吹自擂，話自己以前好純情；近年接觸多咗政治，先發現政黨有幾凶險。八方聽完擘大個口得個窿，如果為官26年以嚟都唔知政治有幾凶險，真係枉為好官，好彩佢早走早着，冇繼續浪費納稅人公帑。

mailto:[email protected]