韓國「國民妹妹」IU去年10月起舉行出道十周年巡迴演唱會，上月更巡到香港開騷，巡演噚日喺濟州島舉行最後一站，更邀得性感歌姬李孝利跟其音樂人老公李尚順擔任特別嘉賓，令粉絲相當驚喜。

李孝利於2013年跟李尚順結婚後就搬到濟州島居住，前年拍攝真人騷《孝利的民宿》而與IU結緣，三人私下感情要好。李孝利、李尚順率先驚喜現身演唱歌曲《Again》，台下粉絲尖叫聲不斷，之後IU再上台與兩人合唱《She's different from me》。IU坦言為咗今次巡演請過唔少人做嘉賓，但李孝利、李尚順嘅出席，就好似邀請家人上台咁，李孝利又搞笑稱因為唔想輸畀IU，所以盛裝現身演唱會，續指：「好耐冇着過高踭鞋、化妝、喺舞台上演出，不過IU拜託我哋任嘉賓，所以就嚟咗。」

精選韓流，喺晒《娛果》
http://fb.com/appledailyent