韓國大熱綜藝節目《RunningMan》嘅主持HaHa，近日喺另一個SBS綜藝節目《叢林的法則》中就慘受到酷刑式嘅新人歡迎儀式，認真慘情。

話說HaHa喺上周播出嘅一集中，佢已經被金炳萬戲弄，先後食咗用猴子肉同柴蟲(即吃木柴嘅蟲子)做嘅熱狗，聽到都令人驚驚。而今晚播出嘅一集中，HaHa繼續受到虐待，節目預告中見今晚嗰集嘅主題為「HaHa隱藏的攝像機」第二彈，喺HaHa不知情嘅情況下，餓住肚子嘅成員忽然高呼話有嘢食，尚算精靈嘅HaHa睇咗眼前嘅食物一眼，起先都覺得好懷疑，但係佢仍然被其他成員嘅演技蒙蔽咗，仲即時張開口就食。

之後，HaHa一食完開心歡呼起嚟，仲大讚啲嘢食味道同糖醋肉差唔多，點知當佢盛讚不已嘅時候，成員就話畀佢知呢啲係柴蟲，搞到HaHa只能苦笑話：「你哋點解咁鍾意呃人？不過我唔想做一個膽小鬼爸爸。」講完之後佢仲主動再生食柴蟲，認真大膽。

另外，HaHa今日喺內地為蒙牛做宣傳，吸引唔少粉絲到場。