中環在線：
恒隆太子爺封盤做人夫 - 李華華
蘋果日報 2017/09/11 05:20
中環在線陳啟宗陳文博已婚李華華新老爺
陳文博
城中「鑽石王老五」又少一位了！講緊嘅係恒隆地產（101）34歲太子爺陳文博（Adriel）。佢爸爸陳啟宗舊年爆料，指阿仔有一位非常漂亮嘅女朋友後，一直冇乜聲氣。華華最近喺上海恒隆廣場翻新開幕party見到Adriel，赫然見到Adriel左手無名指戴上戒指，再問陳啟宗係咪低調做咗新老爺，佢招積地爆出一句「做咗好耐喇」，跟住就揚長而去了。
陳啟宗自爆做老爺好耐
咁啱得咁蹺，陳啟宗又喺舊年9月，喺旗下大連商場活動大爆阿仔已經拍拖，仲大讚個女仔「非常漂亮」，老婆都好鍾意咁話，估唔到事隔一年，佢已經做埋老爺，仲要做咗好耐㖭，恭喜晒。
華華喺上海恒隆廣場個party，都好想藉機會再八卦一下陳太嘅背景，可惜Adriel嗰日忙住招呼賓客。不過，Adriel似乎都係想收埋太太，盡量低調處理，舊年大家追問佢女朋友喺邊度識，佢已經扮撞聾反問「我識咗Ronnie（陳啟宗）幾耐？30幾年喇」，鬼馬到呢！
只可以話，城中大孖沙富二、三代嘅筍盤真係買少見少，好似新世界（017）第三代大部份已婚，新地（016）幾位第三代亦已低調結婚，大家成日見到嘅郭基煇又有女朋友，高大威猛嘅會德豐（020）接班人吳宗權唔知正式封盤未呢？
華華喺上海恒隆廣場個party，都好想藉機會再八卦一下陳太嘅背景，可惜Adriel嗰日忙住招呼賓客。不過，Adriel似乎都係想收埋太太，盡量低調處理，舊年大家追問佢女朋友喺邊度識，佢已經扮撞聾反問「我識咗Ronnie（陳啟宗）幾耐？30幾年喇」，鬼馬到呢！
只可以話，城中大孖沙富二、三代嘅筍盤真係買少見少，好似新世界（017）第三代大部份已婚，新地（016）幾位第三代亦已低調結婚，大家成日見到嘅郭基煇又有女朋友，高大威猛嘅會德豐（020）接班人吳宗權唔知正式封盤未呢？