高官M休息一陣啫,就畀校友會拉咗去做義務顧問,喺沙田搞「一條龍」,將大圍顯徑邨嘅張煊昌學校與馬鞍山嘅陳震夏中學呢兩間中大校友會聯會學校結成聯盟,張煊昌學校小六畢業生可直升陳震夏中學(或自行申請派位)。咦,如果陳震夏中學係好嘢,咁就對張煊昌學校學生好有利咯噃。聽一啲住喺雅典居、聽濤雅苑嘅老友講,陳震夏中學今年辦至中四,三年來聲名鵲起,想申請入讀中一,一年難過一年!
高官M出身中大,做義工都搏命過人,佢以前管沙官,經驗豐富,呢鋪搞中大校友會聯會學校結盟,應該游刃有餘。不過佢素來辦事落力,所以左丁山勸佢:「放鬆啲,身體要緊。」順便一提,各位讀者對醫治耳鳴有乜好介紹,請通知。