袁澧林、彭永琛、陳瀅、吳祟銘、陳健安等噚晚喺荃灣出席新片《那一年，我17》首映。

彭永琛同袁澧林新戲係做學生，仲有一場偷吻戲，佢哋相戀，可惜最後都係無疾而終。問袁澧林有冇試過？佢話讀書試過暗戀學長，但就冇表白，佢話：「如果當時講咗，o依傢就唔會諗番，冇講出嚟到o依家就有個回憶，冇講仲有一個幻想。」

彭永琛就笑話扮演學生冇難度，因為呢啲都係經歷同佢有關，好似成績唔好，夾BAND，不過係冇一個咁靚嘅同學，為咗扮後生啲，彭永琛拍之前會敷下mask，但係袁澧林就曾經同佢講：「我哋第一次見面佢話我留鬚，覺得我似佢後父。」

陳瀅兩日前同好姊妹何雁詩唱K，佢話：「係呀！我哋啱啱一齊食飯，佢幾好，幾開心，知道大家好關心佢，佢會keep住開心，會越來越好。」問陳瀅有冇拍拖？佢直言享受單身嘅樂趣，O依家有冇人追，亦唔需要向人交代，言下之意，係咪之前同何猷亨拍拖，要成日報到呀？佢話：「咁又唔係，因為上一段戀情幾多人注意，所以幾大壓力。寧願大家注意我嘅工作。」