鄭欣宜（Joyce）今日到商台宣傳新歌《你是什麼時候開始不愛我的？》，呢首係佢自組公司後第一首歌，所以喺音樂製作上參與多咗，又可以揀自己喜愛班底，嚟緊3號拍MV時亦係開心班底，佢笑住話：「有時我好變態，返工時見到身邊班底，會忍唔住偷笑，唔知啲同事係咪咁諗。」

自組公司後，Joyce表示弱項係唔識放手，任何事都要參與，可能同自己係完美主義性格有關，佢自言仍然在學習階段中，因為搵得同事返嚟合作，就應該信任對方而放手。呢首歌係公司頭炮作品，問到佢會唔會想喺年尾頒獎禮奪好成績而感到有壓力，Joyce話：「反而冇壓力，舊年《女神》咁好成績，俾咗好多夢寐以求嘢我，亦令我明白冇一條方式可以做到受歡迎歌曲。」