【本報訊】一頭成年花貓，昨晨11時許被發現倒吊在油麻地一大廈一單位外牆晾衫架，腹部遭插傷發出哀鳴，住客發現報警。消防員到場花逾20分鐘將牠救回屋內，由愛協人員交獸醫救治。花貓已絕育，估計有人養，懷疑牠在家中攀窗跳時失足墮樓，跌正晾衫架插傷倒吊，正設法聯絡貓主人。

消防套繩圈救回

現場文蔚街25-32號文耀樓12樓外牆，消防員接報到場，愛協奉召到場協助，消防員進入涉事單位，先後用圍網及竹竿企圖救貓，但都不成功，其間花貓兩隻後腳緊抓住晾衫架，前腳半天吊亂舞甚為驚險，並因郁動觸及腹部傷處，不時發出慘叫聲。其後消防員改用繩圈，一度套住花貓又甩手，花了近7分鐘，終用繩圈索緊花貓身體，將牠倒轉坐起，再用繩圈套住牠的頸部吊起，然後用手托住花貓尾部，將牠抱救入屋，過程約9分鐘。
消防拯救期間，在場目睹的住客都戥貓心驚，「倒吊好辛苦㗎！」牠獲救後，住客頻呼「好彩勾住咋，唔係跌落去死梗，真係大難不死！」受傷花貓事後由愛協人員接走交獸醫救治。
■記者梁澤岡