嚟緊西甲有新面孔，係嚟自加泰隆尼亞省嘅傑羅納，呢隊波以西乙亞軍身份首度升班，但其實佢哋同英超嘅曼城有一定淵源，曼城領隊哥迪奧拿嘅哥哥，宜家係傑羅納大股東，而升班之後，曼城所屬嘅城市足球集團，就準備全面收購傑羅納，並會外借7名年輕球員到呢支西甲升班馬。

由中東阿布扎比政府支持嘅城市足球集團，除咗曼城之外，近期都積極擴張世界各地，好似美職紐約城、澳職墨爾本城、日職橫濱水手以及英乙嘅托基聯。如果順利收購，傑羅納將係曼城第5支衛星球隊，而得到城市集團支持，新一季傑羅納班費預算增加5倍到5千萬歐元（約4.35人億港元）。除了俾錢，曼城亦預期外借7名年輕球員到傑羅納，吸收西甲上陣經驗。