今屆區選有少少爆冷，有啲人都話估唔到，咁多傘兵空降殺出重圍，但更多人詫異嘅係，連啲資深地頭蟲以致重量級雙料議員，竟然都被拉下馬，搞到區選後成地眼鏡碎，就算建制派唔認選戰失利，心水清嘅市民都會有眼睇。
花生友聽聞，未等各界回氣，已經有建制中人擺定位，誓要喺今屆區選失利場，部署攞番個位。
如果今次區選建制派輸咗嘅議席，係民建聯或西九新動力原屬議席，據知下屆區選如無意外都會照由佢哋搵人出選，邊度跌低、邊度起番身吖嘛。

所以大家更關注嘅呢，其實係嗰啲扮獨立實則建制到暈嘅無黨派人士議席，皆因佢哋呢次敗選後，西環又要搵番合適人選出戰，有建制花生友話，怕且呢啲肥缺，幾大黨派都有排爭，佢仲苦中作樂笑笑口話，咁樣睇嚟，隱形建制派輸咗，都唔係完全冇好處箒。
有建制派中人都同花生友講，其實今次墮馬嘅無黨派建制派中，有啲真係懶到出汁，但佢哋以前做得不過不失，冇病冇痛就唔好意思叫佢哋讓位，但佢哋最終敗選，就畀咗一個換人上陣嘅好機會，據聞有啲新區、尤其俾泛民突襲成功搶位嘅區份，已經喺內部醞釀緊下屆搵新人上陣，希望四年後收復失地，所以泛民都唔可以掉以輕心呀，樹大招風，難怪有啲泛民新丁都話，低調啲免被狙擊，未嘗不是好事。

花生友
周二、四刊出