其實鍾瑞明同民記中人早有淵源,又係港進聯成員,兩黨合併後佢過檔做顧問。民建聯總幹事出缺近10年,因為馬力做秘書長時親力親為,家陣要發大嚟搞,所以要請番個人睇檔,況且失業率高,「執政聯盟」幫忙創造一個就業職位當仁不讓。
鍾瑞明係港大國粹派中堅,畢業後入南商由低做起,85年任中英土地委員會中方代表,參與籌建土地基金,後來做埋基金行政總裁,回歸後係老董身邊紅人,獲委入行會,又做過房協、城大校董會主席。
老董落台後,佢被摒出權力核心,重返商界做過世茂中國CEO,後來轉去亨達國際做MD,現時係聯通等多間上市公司非執董,唔知同黨務有冇利益衝突,要唔要辭職。