今日係Art Basel VIP預展嘅第二日，繼噚日有李嘉欣一家三日同徐子淇同老公李家誠，今日繼續星光熠熠，接力嘅有台灣嚟嘅吳建豪，下晝約4點，《蘋果》見到吳建豪同一男一女嘅友人到達展覽會場。雖然戴上黑超，但照舊有唔少人認得佢，「回頭率」係呢兩日以嚟最高嘅。更有唔少女性邊拎住相機邊跟實喺吳建豪後面。

直到經過一個日本藝術家嘅展覽位置時，即禮貌除低太陽眼鏡，同藝術家寒喧，呢個時候，附近嘅女fans即按捺不住，衝上前要求同吳建豪合照，而吳建豪亦冇托手肘，同咗3、4個人影相，不過見群情洶湧，佢都即刻戴番副黑超，急急腳離開。

另外，今日展覽亦見到王菀之同老公Eric So、Juno麥浚龍同中英混血模女友Janine都有嚟朝聖，記者影相時，王菀之即笑住話：「佢（老公）好怕醜o架，唔想俾影。」問王菀之有冇心頭好，王菀之話有，不過當問佢會唔會買返屋企擺，佢即講：「梗係唔會啦，好貴o架，睇吓就會。」

《蘋果》第十二屆金話梅電影選舉（Golden Plum）又嚟喇!由今日起，請在以下網址（ http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。