港九區學界D1田徑賽決賽今日喺灣仔運動場上演，經過首兩日賽事，衞冕嘅喇沙同女拔萃分別喺男女子組帶出，好大機會「冧莊」。講到焦點選手，一定要提男拔萃中六「跳遠王子」陳銘泰（上圖右一），星期二以7.64米打破塵封26年嘅男子跳遠香港紀錄。泰仔今日出戰男子三級跳，呢個項目嘅港績（15.56米）由謝秉善保持咗24年，泰仔有冇機會再刷新港績呢？「三級跳個人最佳成績只係14.45米，要破都唔容易，即管一試啦！」泰仔仲會參加4x100米接力，雖然男拔目前總分落後喇沙43.5分，要反先都好難，但泰仔都希望贏晒呢兩金，完美畢業！

女子組最緊張嘅反而係護級形勢，12支參賽學校，包尾兩隊就要降班。前特首參選人唐英年嘅母校培正，上屆全靠「欄后」呂麗瑤（左圖）喺女子100米欄稱后，總成績排尾3，成功護級。就快要高考嘅麗瑤，今屆要力爭衞冕100米欄，再幫學校創奇蹟。（now631台今日8:45am直播）