開鑼日（2日）由全熱門潘頓做騎師王，但實際贏得兩場，又被大眾預期少，說潘頓狀態唔好？點睇都唔似！倒不如話其他騎師眼見少了雷神隻手遮天，頓時賣力起來要搶地盤，亦收近了與潘頓差距。

翻看今次有份上陣的騎師，只得四位在開鑼日走馬河零三甲，當中吳家晉及潘明輝出馬三匹或以下情有可願，但最多馬跑（五匹）的楊明綸，兩匹有飛馬「有衝勁」及「真好彩」前中段外遊取位麻麻，騎前駒還要阻人罰埋停賽，而「清新動力」及「孟買之星」拉士又撻唔晒，似乎楊明綸不是太弗。

明晚（5日）這位華將又有六匹馬跑唔少，當中「新威龍」、「雷公鑿」甚至「塑料喜」預計都有捧場客，不過押注時請考慮鞍上人狀態。

暑期不少評論提到以上季尾表現，意大利籍騎師沈拿今季際遇向好，但開鑼日只出馬三匹令人跌眼鏡，周三晚情況有點好轉五駒應戰，沈拿還是要加多二錢肉緊以求站穩陣腳。

其中第五場「王者再現」上季曾在他胯下贏過谷草，不過打後竟無份跑，明晚難得能重獲帥印，按理不會將機會輕易漏走。

以「王者再現」上季拉士一場走位麻麻，仍可於四班谷草千八奪季，季初跑一哩長途馬明顯上風，開鑼便有「乘勝追擊」大勝，兼且「王者金剛」前季初出爆大冷，今戰可行贏馬舊路。

至於第四場「艦長天下」上季最後一戰谷草千二排大外檔局留，末段交22.2快拉士輸唔夠一個馬位跑第三認真吸睛，何良這類質新馬多好開就好，今次「艦長天下」抽三檔好位，勝望甚濃。