反董連任大聯盟近來好鍾意喺星期日，去旺角行人專用區搞論壇，今個星期日又會有一個社會福利論壇，邀請咗樂施會總幹事莊陳有做嘉賓。不過八方聽講莊陳有突然決定唔去，令大聯盟亂咗陣腳；有人懷疑樂施會係咪挺董，所以放大聯盟飛機。
莊陳有噚日同八方解釋，無論係佢個人還是樂施會，都冇反董或者挺董立場，但之前佢應承大聯盟時，講明以個人身分出席，但有樂施會同事提醒佢，佢嘅公眾形象同樂施會好緊密，冇乜個人身分可言，同事覺得樂施會唔係好適合喺政治舞台討論福利政策，佢諗過之後都覺得啱，所以推咗呢次邀請。不過八方就諗，其實政治與民生，又係咪分得咁清楚呢？


E-mail：[email protected]