超過30年冇喺香港開騷嘅陳美齡，噚晚喺灣仔舉行講唱會，獲毛舜筠同女兒、劉天蘭、陳志雲、同家姐陳曦齡捧場，昇平同協平兩個仔喺尾聲現身，喺台上攬攬媽咪。陳美齡以一身白色天使，同一班小朋友合唱《世界真細小》展開序幕，之後唱咗兒歌、日文歌、國語歌同廣東歌，亦有分享培育小朋友嘅心得。

陳美齡唱《香港‧香港》嘅時候話：「雖然嫁咗去日本，o依家小朋友已經長大，多咗時間返嚟香港同媽咪住，香港係我心目中嘅故鄉，我從來冇忘記過香港，今次能夠返嚟做少少貢獻係好開心。」講到培育小朋友，陳美齡話：「要培養小朋友自我肯定能力，要接受自己，做好人生，最緊要唔好同人比較，好多時喺家長壓力之下，小朋友自我肯定能力會降低。」

陳美齡憶述：「我後生嘅時候，自我肯定能力都好低，屋企有六兄弟姊妹，我排中間好多時被忽略，親友都鍾意比較，兩位家姐好優秀，其中一位家姐係演員陳依齡，到o依家呢個年紀都幾靚，有一位好有人氣又靚嘅家姐；另一位家姐，讀書嗰陣考第一，入咗大學就醫科畢業，真係攞命！大家姐美麗可人，二家姐聰明伶俐，媽咪成日聽到人哋咁樣稱讚，就會向人道歉，講對唔住，話陀美齡時候食得唔好、環境唔好，我聽到後，覺得自己係一個『缺陷製品』，好自卑。」

直到陳美齡去咗一間學校見到有幾十位有缺陷小朋友，因為佢哋身體有殘缺，嗰陣佢哋用歡呼聲歡迎大家，估唔到改變咗自己，佢話：「聽完呢一個歡呼聲後，人生就改變咗，通過做義工接觸好多小朋友，有啲有病，睇唔到嘢，原來我好幸福，我有瓦遮頭、有飯食、有書讀、有兄弟姊妹，唔會死咗冇人理，身在福中不知福，我擁有一個好珍貴嘅生命，所以仔女也好、老公也好，朝早拍拍佢仲有呼吸就係好好，唔好理佢瞓得遲定早。」陳美齡話當年唱咗《Circle Game》之後，去咗日本發展，佢認為家長支持小朋友係好重要，小朋友要有夢想，要學識成功都要謙虛，失敗唔好放棄，家長要支持同鼓勵，所以好感激爸爸。

完騷後陳美齡接受訪問時，話兩個仔專登喺美國返嚟，不過因為太怕醜，所以只係叫佢哋一齊上台同大家打個招呼。老公因為攞唔到假，所以趕唔到返港。講到幾十年冇喺香港開騷，佢就話：「真係好感動同難得，估唔到過咗六十歲仲有咁好福氣，可以開到演唱會。」胡楓唱到八十歲都仲唱緊？陳美齡話：「唔知呢，睇吓聲音到時唱到幾多，因為自己曾經得過癌症(乳腺癌)，之後要重新練習過把聲音，唱法都有少少唔同，但o依家都享受唱歌感覺。」陳美齡笑言多謝觀眾嘅合作，做完覺得鬆一口氣。

精選娛聞，喺晒《娛果》
http://fb.com/appledailyent