盛傳係曼聯今夏收購目標之一，花名「公雞」嘅意大利比洛迪，喺周日世盃外歐洲區G組賽事，意大利主場5:0大炒列支敦士登嘅比賽，呢位拖連奴中鋒入一球兼貢獻一次助攻顯身價，唔知曼聯領隊摩連奴睇完之後，有冇興趣畀贖身費1億歐元（約8.7億港元）收購呢？

比洛迪以叫公雞，因為佢入波慶祝嗰陣鍾意將隻手扮成雞冠咁。曼聯唔同伊巴續約，今夏勢必會簽個世界級前鋒，傳聞目標唔少，包括有艾華路莫拉達、基利安麥巴比同埋效力意甲拖連奴，上季射入26球嘅比洛迪。周日意大利主場出擊迎戰魚腩部隊列支敦士登，比洛迪著9號球衣出戰，表現亦非常出色，入第2球之後再助攻畀隊友艾達馬田斯，助意大利5:0大勝。

比洛迪早前同拖連奴續約，合約贖身費加到1億歐元，球會主席卡爾路就一副唔憂賣嘅樣，日前接受意大利當地電台訪問時話：「比洛迪呢排好忙，踢完國際賽之後到周四會同佢愛人拉埋天窗，我都獲邀出席。我好在乎佢，希望佢可以繼續留喺拖連奴，佢同球會到2021年先約滿，邊個要買佢唔該先去準備一億歐元，就算有球會肯畀，都仲要佢本人願意走人，我亦相信佢喺拖連奴過得好開心，唔打算走人。」