現年36歲嘅韓劇《鬼怪》「地獄使者」李棟旭，上周被爆撻着23歲嘅「國民初戀」秀智，兩人被爆戀情後都好快認拍拖。

而公開戀秀智後嘅李棟旭，喺爆出戀情後首度訪港，出席聽日嘅Givenchy品牌活動，佢今日下午已從韓國仁川機場出發飛香港，出發時李棟旭雖然笑容唔算好多，但見到粉絲都有即刻舉V打招呼，好不親民。

李棟旭今日於下午5時30分，比原定班機時間遲咗，佢現身時就戴上黑色口罩，現場有約10名保安維持秩序，亦有10多名粉絲到場，當中不乏着住校服現身嘅粉絲，有其中一個粉絲好有心思畫上一幅油畫送畀李棟旭，佢仲好認真咁欣賞幅畫，又細心摺起來好好收藏。

一出閘，李棟旭即企定定畀記者影相，又親民地揮手，見到粉絲亦有走近粉絲堆中為佢哋簽名，Nice爆燈。而李棟旭行去停車場時，沿途都有粉絲跟住，仲不斷同佢傾計，雖然李棟旭就全程不發一言，但聽到粉絲就大讚佢靚仔。而李棟旭見到傳媒同粉絲追住佢影相時，都有示意大家要小心，臨上車時就繼續揮手同大家講再見，全程禮貌十足。

更多韓流，喺晒《娛果》
http://fb.com/appledailyent