藍籌股又放榜喇！今次會由恒隆地產（101）同恒隆集團（010）喺今個禮拜三（26日）揭開序幕，公佈截至舊年12月底嘅中期業績。華華仲記得，恒隆前執行董事吳士元喺舊年7月，即係恒隆公佈全年業績之前辭職，引起市場一陣哄動，話晒吳生喺恒隆做咗9年，唔多唔少已經等同恒隆嘅標誌，陳南祿一嚟做董事總經理，佢就同公司分手，真係盲嘅都知咩事啦！
講番吳士元，佢辭職之後一直好低調，無咩聲氣，不過原來佢上個周末先至正式喺恒隆lastday，聽講一班舊夥計仲為佢設宴fairwell，鬼咁有人情味。華華聽聞，吳士元舊年7月遞信辭職，由於佢係高層，所以要半年通知，佢喺呢半年，名義上仲係恒隆員工，只不過個人冇返工啫。
如果係咁嘅話，照計佢手上批認股權仍然可以行使，佢未辭職之前已經行使咗小部份認股權，袋咗過億落袋；恒隆股價喺過去半年一直高企，挨近40蚊，粗略計吓，如果吳士元行使晒所有認股權，起碼袋多兩、三億，真係唔使做都生活無憂啦，使乜打工受老闆氣喎！