近年唔知點解，政客官僚文化人都話自己愛睇黃仁宇作品《萬曆十五年》（圖），成為政界潮流。十幾年前睇過呢本書，黃仁宇筆下歷史人物幾有趣，佢所探討嘅問題係有意義，尤其在今日香港特區。本書英文名稱叫「沒有意義的一年」，事實上明中葉萬曆十五年冇大事發生，黃仁宇係想寫出中國在十五世紀成熟官僚政治下，一切改革變得不可為。朝中大臣只沉溺於道德議題爭拗，如太子人選、妃嬪住處，不斷引發大臣黨爭。

大班在《信報》寫了一篇批判特區官僚專政文章，令我諗起《萬曆十五年》呢本書。話說警監會申請幾百萬額外經費做宣傳及清理積壓個案，點知保安局代表去到庫務局Bid錢時被否決，委員大班聯同警監會主席翟紹唐要求出席由三司主持StarChamber上訴會議被拒，大班當日踢館踩場，親身去總部會議室門外要求入內不果，在門外與庫務局常秘口角，最後悻悻然離開。
按規矩，現時不同政策管制人員係政務官出任的常任秘書長，只有佢先可代表政策局出席庫務局資源分配會議，呢個叫做RAE，ResourceAllocationExercise會議好重要，任何政策改善要攞新錢便要去Bid，一旦否決就冇錢做收得工。
而政務官控制住資源，就等如揸住問責局長要害，局內政務官出任的常秘與庫務局政務官同一系統出來，同聲同氣，常秘成為爭取撥款關鍵人物，冇佢支持，無論局長有何絕世好政策，一旦去到庫務局Bid錢就會被打沉。更重要係，即使常秘同局長副局長不咬弦，常秘調動權力係歸公務員事務局長，局長好難踢得走唔啱Key嘅常秘。錢、人、地三項重要資源緊握在政務官手上，佢哋先至係真正執政黨。
下任特首即使有新思維去搞貧窮問題、搞產業政策，有冇足夠政治力量去壓服官僚層，會係一大關鍵。否則只會陷入無止境務虛爭論，一如萬曆十五年！
添馬男