黃奕、孫耀威同張慧儀等，噚日喺西貢為冼國林執導嘅慈善電影《我們的6E班》開鏡，黃奕專誠來港拍攝，為了公益更不收取酬勞。黃奕喺國內工作，亦不忘照顧女兒，佢話：「她已上學，放假都會帶她去旅遊，去過很多地方，眼界開才會胸襟大，每天快樂。」

提到前夫黃毅清指佢第三度結婚，黃奕話：「真被嚇了一跳，自己都不知道，這是我尊重的姐姐跟姐夫的兒子結婚，但傳媒烏龍誤會了，對不起他們受到不必要的困擾。」問佢遇到合適對象時會否考慮再婚？佢話：「我現在的時間已經不夠用，想多點陪女兒及爸媽，帶他們去更多地方，看着女兒成長的過程很重要。」前夫經常炒作會覺得不快嗎？黃奕話：「已經結束了，彼此祝福之後生活更好吧！」

此外，孫耀威在片中飾演老師，想起中學時自己也曾是頑童，佢話：「當時有個老師染金髮着紅皮褲，因為佢鍾意夾band，o依家我哋係好朋友，嗰陣時佢仲帶我去酒吧ladiesnight，教我人生哲理，入到我世界。」而佢透露正將內地嘅生意同演藝事業搬回香港，佢話：「出道咗20年，都好似冇喺香港好好做過啲乜，人民幣好好賺，但港幣賺得開心，想喺香港做返啲嘢。」