廣播劇界「開山祖師」李我，95歲高齡，日前因老人病入院。

劉天賜昨晚在fb貼出李我叔在病床對鏡頭單眼笑的相片，丁羽、陶傑、鄧英敏與太太等都有去探班。劉天賜留言﹕「九十多我叔入院。親友祝福，仍很生猛。早日康復。」

與李我叔同是文化人嘅陶傑，今日接受《蘋果》電話訪問，表示李我叔全盛時期喺50年代，佢話:「佢出名嘅係一本佢自己作嘅小說《蕭月白》，已經絕晒版。好細個聽過李我叔嘅天空小說廣播。到後來佢老婆蕭湘接班，我就聽多啲，間唔中李我叔都有講下。」

陶傑話李我叔拍電視劇《香港81》系列飾演算命師覺悟因時，當時喺英國，所以未有機會欣賞，印象最深就係李我叔嘅記憶力，佢話:「粵語片時期，娛樂圈嘅嘢佢記得晒、知道晒。人物白燕、吳楚帆、張英、張活游都記得。佢有好多娛樂圈秘史，都係飯局度爆出嚟，不過上次去飯局李我叔年紀大咗，冇乜嘢講。」

此外，李我叔與太太蕭湘去年9月在君悅酒店慶祝60週年鑽石婚紀念日，兒孫滿堂，譚炳文、黎彼得、丁羽、陶傑等均有出席。當時李我叔需要坐輪椅，戴上紅色頸巾，但精神不俗。