如果去年3.26敵得過獲中央支持嘅林鄭，登上特首寶座，相信前財爺曾俊華而家都要整理上任一年嘅功績，準備7.1前交功課，未必有時間喺fb同大家connect交代近況。

久未喺fb發放短片露面嘅薯片叔，今日就喺短片中話自己喺一月「冷河期」過後，喺面書問過大家意見，未來自己究竟做乜好？結果大部份人都希望佢繼續為社會服務、幫助年輕人、保持香港核心價值、改善民生等等，而佢同朋友經過幾個月商討，最近事情終於有啲進展。

薯片叔宣佈，最近搵到舊同事提供免費法律同會計服務，更獲有心人提供埋寫字樓，現正進行成立公司工作，指公司暫時叫做「Esperanza」，西文牙文解作「希望」，中文名就叫做「薯片叔叔合作社」，相信咁樣大家會易記好多。薯片叔仲話成立公司後，由於要請人做嘢，所以會盡快籌款，未來如果再有新發展，會再向大家匯報。

嗱嗱嗱，薯片叔喺民間嘅影響力，上年跑馬仔已經充分引證；今趟佢重出江湖，唔知政圈會否從此又暗起風波？