阮民安，又叫擾民安——包括黐GD合照、炒黃牛、賭錢欠債，仲傳俾人由澳門「邀請」佢返香港撲水；又試過被指做租霸欠租被趕走，自組公司蝕錢再借錢(取自「香港網絡大典」)。如果你叫佢「樂壇小強」、「港版G-DRAGON」。你叫佢任何一個名，佢都會應你，並且將佢本人嘅「擾民」報道擺上facebook，解釋或自我宣傳一番。

今日呢單，係擾民安另一新猷……件事好複雜，先係卓韻芝喺大約一小時前，喺網上鬧爆擾民安:

「前E-KIDSTommy仔，叫一個細路女搵我助手，助手比(俾)聯絡人電話佢，佢係要叫人直接搵到我個私人電話為止，打嚟幾百次。
「Tommy仔，你唔好教壞啲細路女， 受氣嘅係佢，冇面嘅係你 。不要撐說這是誤會，亦懇請你在事後唔好鬧個細路女。無論做咩嘢，道德，是第一天條。而道德的基本體現，就是禮貌。」

就咁睇，件事應該係，擾民安搵細路女助手致電阿芝助手，問佢攞阿芝電話，阿芝助手只係俾咗個聯絡電話佢，唔肯俾阿芝手提。跟住呢，擾民安 「係要叫人直接搵到我個私人電話為止，打嚟幾百次」 ，係都要攞到阿芝私人電話為止。攞唔到喇，估計擾民安要佢個細路女助手受氣，所以阿芝就喺網上為細路女抱不平話：「你唔好教壞啲細路女，受氣嘅係佢，冇面嘅係你。」公開鬧爆，好火吓喎！

擾民安喺約十分鐘之前，爆粗回應卓韻芝，成篇都係「...」，代替「逗號」，好有特色。原文如下：

「阿卓小姐...唔x知你係咪第一次做導演好大壓力....呢單嘢從來都冇誤會...純粹係你無啦啦搞事...個助手亦都冇錯...件事係有個活動想搵你做mc...而活動個主角係你識ge...亦都只想喺活動前將一d未出街ge貨品親自送俾你以視(示)『尊重』...亦希望你能為該活動打一打氣...所以有同事打咗俾你幾次...絕對唔會係幾百次...咪x誇大...希望可以親自聯絡你...我相信好多pr公司都會咁做....成單嘢我睇唔到有咩問題...你聽都唔聽就小個細路女...你又幾識尊重呢??...你估你真係阿姐咩...大家都係揾食姐大佬...嚇親細路女ge唔係我...小事化大ge都唔係我...你套戲上la咩...咁快搞宣傳??唉...呢排拍戲d女個個都chichi地....」

擾民安嘅版本，係話有人搵阿芝做活動MC，之前想送份禮俾佢，所以「有同事打咗俾你幾次，絕對唔會係幾百次」；擾民安又話阿芝「你聽都唔聽就小個細路女」——言下之意，鬧爆「細路女」(即擾民安助手」)嘅，係阿芝唔係擾民安喎。擾民安仲寸爆阿芝小事化大，目的只為宣傳佢執導新片《爆3俏嬌娃》。

羅生門，唔知邊個啱，但幾唔客氣都好，兩度用到「X」字……小心有人要你寫報告呀港版GD！