香港慘遭「山竹」蹂躪，但今朝落波後「停課不停工」，一眾打工仔都要迫地鐵返工，咁唔喺鐵路沿綫點算好？答案就係好似行會成員、新民黨主席葉劉淑儀咁，I go to work on foot！

家住半山嘅葉劉今日都要返工，佢喺Facebook分享，因為回家必經之路波老道塌樹，車輛未能通行，所以一早一晚都係行路上落山！擁有「運動員脈搏」嘅葉劉，認真唔嘢小。

葉劉自爆朝早個女都叫佢唔好返工，但係探聽過有安全路線後都係堅持上班，但上落沿路要繞過好多塌樹，情況危及好多居民安全，強調唔可以掉以輕心，「回家途中我一直有留意四周環境，擔心若風雨來臨，隨時再有塌樹危機」，至於聽朝行唔行山返工，佢話都要再諗諗。

葉劉仲話已經搵咗山頂區議員楊哲安「求救」，亦因應新民黨總部大廈一度停電，好多大西北同事都返唔到工，佢都帶頭講明彈性上班，甚至home office，「最重要是確保安全的情況下，同事們才可上班。」

葉劉貼地體察民情夠晒互諒之餘，仲有危機意識，話晒即使打完風，交通仍嚴重受阻，樹木又隨時有倒塌危機，真係完全未可舒一口氣㗎。