夏天又嚟嘞，小妹一早改着吊帶背心加熱褲，搞到同事雄雄成日喺側邊騷擾我。呢幾日佢仲話約我去海洋公園同埋廸士尼樂園玩。吓！約人約到咁例牌？雄雄笑笑口話，一啲都唔例牌，海洋公園啱啱開咗間港式海洋冰室，最啱火辣情侶嘆番杯冰鴛鴦下火。廸士尼今日到8月推出全新嘅夏日互動娛樂設施「哈囉阿古」，帶旅客去海底世界消暑。

採即時聲能動畫技術

聽落好似幾好玩噃。雄雄話，成個互動設施運用咗先進嘅數碼投影同即時聲能動畫技術，將現場設計成動畫電影《海底奇兵》咁嘅款。擔大旗嘅主角係150歲的大海龜阿古，佢會同大家玩遊戲，講吓海底嘅趣事，「仲會教人講海龜話㖭。」
雄雄話，同大海龜傾完偈，跟住可以睇米奇水花巡遊。米奇班百厭星會用灑水器向圍觀旅客噴水，保證一定濕身。唔係嘞啩，玩到要濕身？濕就濕啦，小妹應承咗雄雄去廸士尼。佢仲話𠵱家買飛都好方便，下周一起可以喺OK便利店買到廸士尼門票。
逢周六、周日刊出
電郵：mailto:[email protected]