日本藝能界頻頻爆出不倫戀醜聞，近日再有不少偷食傳聞曝光，如實力派二人組KOBUKURO（可苦可樂）成員小淵健太郎，就被雜誌《週刊新潮》踢爆多次背妻偷食，而且當中不乏著名女星。小淵健太郎97娶拍拖多年嘅中學同學後，兩夫妻育有兩個子女，一直建立出好好先生形象。點知小淵被公開同小三嘅偷食短訊，外遇仲遍佈日本各地，有指一名出生於宮崎嘅女星都同佢有染，有爆料網直指女方就係形象麻麻嘅紗榮子。

至於31歲女星上戶彩，4年前同EXILE隊長HIRO閃婚，去年產下一女，HIRO今年以開工理由時常失蹤，搞到上戶彩要獨守空幃。近日唔止一間傳媒指上戶彩婚姻觸礁，盛傳其夫搭上EXILE師妹組合E-girls其中一位成員，消息已傳到上戶彩耳邊，令兩人隨時離婚收場。