近年影星趙薇除咗上娛樂版，亦經常見到佢喺財經版出現，除咗因為佢同阿里巴巴主席馬雲老友鬼鬼，更重要係佢老公黃有龍係有名富商，而且仲要係頻頻入股香港啲上市公司，前日佢又出手，斥資約4億元入主高爾夫球設備產銷商順龍。
呢單嘢除咗係近一個月內，黃有龍第二度投資上市公司外，計計埋埋，黃有龍已經持有最少四家上市公司股份，而且呢次入主順龍，計晒股份同可換股債券，黃有龍最多會持有順龍60%權益，計落應該係第一次做上市公司大股東。

個人賬面賺3.3億

有名人新股東入主，股價通常會大升，但噚日順龍復牌嘅表現就唔係好得，逆市跌咗25%，其實換轉舊年港股大時代嗰陣，名人入股呢啲大消息，隨時令隻股升幾十巴仙，噚日順龍表現，不禁令人感到名人效應不再。
咁黃有龍咪要蝕好多？又點會呢，睇番交易通告，原來黃有龍以0.114元認購順龍28.61億股新股，即使噚日順龍跌到0.23元，㩒一㩒計數機，佢賬面已經賺咗3.3億元。查實黃有龍同趙薇嘅投資眼光一向厲害，最經典當然要數佢哋前年年底以31億元入股馬雲隻阿里影業，事隔五個月即刻減持，淨袋5.89億元，問你服未！

李華華
mailto:[email protected]