【仔定女？】陳凱琳過了懷孕期一半 下周開Baby Shower公告BB性別
蘋果日報 2020/06/29 13:53
陳凱琳劉鳴煒鄭嘉穎
陳凱琳（Grace）和鄭嘉穎婚後育有現年1歲多囝囝鄭承悅（Rafael），兩公婆早前「520」時公佈懷第二胎，當時照片顯見她腰間圓潤。Grace 宣佈陀B後今日首度現身活動，腳踏3吋幾高踭鞋，身穿貼身裙肚凸凸，目測她有近5個月身孕，不過依然得天獨厚，肥肚不肥身，但明顯胸部豐滿。
Grace透露懷孕期過了一半有多：「幾多個月唔講，總之好穩定、健康，今次比第一胎舒服，胃口幾好，下星期會同幾個女性朋友開baby shower公開bb係仔定女，做媽咪都鍾意慶祝，而且第一個bb有，第二個都希望有。」囝囝Rafael暫時未意會升任哥哥，Grace說：「佢可能仲細，唔係好知道，但見住佢一日一日成長識行識走好神奇，佢試過走埋嚟篤一篤我個肚就行咗去。」Grace擔心哥哥日後會呷醋，收集坊間意見買定禮物代送給Rafael：「佢比較鍾意睇書，成日坐喺我大髀要我讀書佢聽，希望繼續培養佢呢個習慣。」
Grace第一胎選擇開刀分娩，今次仍在考慮中：「仲未決定，順其自然，我個人較細粒，安全起見交畀醫生決定，自己唔諗，總之食得瞓得就ok。」日前Grace29歲生日，獲老公鄭嘉穎送上心愛禮物一齊慶祝，她笑說：「出年30大壽先大搞，人生得一次30 、40 、50。」見Grace腹大便便還腳踩高踭鞋，她即指：「呢對唔高啦，嘉穎知我工作出場時先着，之後立刻換返，ok嘅。」Grace大肚後明顯豐胸，她即撒嬌：「我唔講呢啲呀，的確上磅重咗十幾磅，之後都要keep，好多人都嚇我生完第二胎難收身。」
有傳老公鄭嘉穎回巢拍劇是為她還劇債？Grace說：「咁好，可以咁咩？當然唔係，大家有商有量，嘉穎返去同好朋友馬國明拍劇都好開心。」她則強調自己仍有戲癮，但會以家庭為先，亦有指Grace想半退出幕前當全職KOL，與大台主動提解約，她否認其事，和大台仍有合約在身。
陳凱琳陀B首度出席公開活動。
劉鳴煒（左）與陳凱琳一同主持儀式。
陳凱琳腳踏3吋幾高踭鞋。
陳凱琳表示下周開Baby Shower公開第二胎BB性別。
陳凱琳戴口罩做足保護。