平時好鍾意踢波嘅林文龍，最近同明星足球隊嘅成員踢波耍樂，但就好唔好彩咁發生咗輕微意外，林文龍因為好勇咁落場踢波，唔小心跌咗一吓之後就傷咗鎖骨，佢當時已經係咁嗌好痛。
喺球賽之後，林文龍立即去睇醫生，由於鎖骨個位置可大可小，醫生勸喻佢要暫時停止晒啲工作休息。

馮仁昭都有啲擔心文龍嘅傷勢，於是打畀佢無綫經理人Rocky，佢話：「文龍呢排都會閂電話，留喺屋企全面休息，佢之前踢波傷咗鎖骨，醫生同佢戴咗頸箍，要固定鎖骨受傷嘅位置，畀個傷口自然癒合，醫生話最少要幾個月，所以文龍呢排好乖咁留喺屋企。好彩佢之前已完成晒手頭工作，所以都冇影響到流程。」
而喺林文龍受傷前，佢就陪咗老婆郭可盈去咗新加坡旅行，佢哋玩得好開心，吃喝玩樂，好彩係受傷前玩咗一輪，如果唔係臨時受傷影響行程就好鬼掃興。