經紀陳噚日推介零售股恒豐金業（870），當真不負所託，單日大升10.38％，收1.17元，成交股數1903萬股，金額2135萬元。
經紀黃噚日問小初記唔記得早排慧峯集團（8228）急升，帶動多隻創業股一齊急升事件？佢重話眾多炒高的創業板股中，亞科資本（8088）最值得留意。
亞科資本在3月底公布全年業績，轉虧為盈，盈利有成3360萬美元，加上慧峯急升效應，亞科股價曾由0.10元水平炒上0.235元。
原來古仔重未完，聽聞有間歐資行幫亞科資本計過數，發現間公司係好值錢。亞科資本在科網股爆破後，收購咗1間企業融資公司，兼夾在英國上市。呢間英國上市附屬公司其後又投資1檔石油及燃氣生意，而亞科資本得以轉虧為盈，原來都係因為呢檔生意。
經紀黃話呢間英國上市附屬，市值有成2.2億美元，以亞科揸住78.4％的權益計，已經值成1.74億美元咁多。
慕容小初