【異動空間】下月再現負油價?(魏力)
油價魏力
期油負價慘劇越來越花生,有市場人士發現,芝商所(CME)在4月15日靜雞雞出通告,話自己已更新系統,就算油價出現「零或負數」,CME系統亦能正常運作,仲要即時生效。
究竟CME真係咁醒水,抑或「有心人」一早提水?不說自明。更重要是,當時距離5月期油結算只有不足1星期,券商想更改系統亦難以趕及,何況發夢都無諗過油價可以變負,結果被殺個措手不及。
至於這位「有心人」是誰?最大嫌疑就是打價格戰以本傷人的沙特。油價跌唔緊要,就沽空期油賺一大筆,不少資金在油價近零時撈底,以為最多本金歸零,結果中了個大伏,埋單-37美元結算,無仇報。
6月期油會否又變負?先戴頭盔,魏力絕非油市專家,只是嘗試運用現有資訊作邏輯分析。上月空軍偷襲得手,今次大家有所防範,撈貨者必然大減,變相令沽空難度增加。但從供求分析,疫情減而不退,美國上周五確診人數創新高逾3.8萬人,周六亦達3.5萬人,反映疫情根本未受控,倉卒復工只會拖慢復蘇,令石油需求持續低迷。
另一方面,分析指全球油儲設施已近爆滿,20多艘油輪周末被拍到在加州沿岸停泊,無處卸貨;市場預期1個月內,全球34億桶油儲空間將會爆滿,而目前至少有1.6億桶在海中飄浮。無地方儲油,自然無人想拎實貨,如下月中交割期前,產油國無法達成部份停產(現況下減產都唔夠)協議,貼錢賣油將會重演。而作為駕駛人士,魏力最希望當然係減油價啦!
魏力
www.facebook.com/2012jason