史上最貴嘅廣深港高速鐵路香港段，好有可能喺下星期嘅立法會通過撥款，民間團體發起聽日舉行「反高鐵．停撥款大遊行」，call齊菜園村村民、大角嘴街坊、文化界、工程界、學者等關注高鐵工程嘅各路人馬，上街抗議。
一直跟進開高鐵問題嘅香港慢慢發行動組近排亦好努力搵料，仲搵到唔少前行會成員同現任立法會議員與高鐵工程嘅關係資料，準備公開畀公眾參考，等大家了解支持工程嘅議員背後，代表緊啲乜嘢利益。
好似地產界議員石禮謙咁，佢係港鐵董事，「慢慢發」認為呢個係好明顯嘅利益關係。除此之外，石禮謙又係新創建非執行董事，新創建旗下有間惠保（香港）有限公司，拎咗份價值1,100萬嘅高鐵合約。石禮謙話佢一直有申報唔同公司嘅董事職務，相信立法會有機制處理利益問題。

金山集團及時賣物業

另一位一直支持高鐵去馬嘅工程界議員何鍾泰，係中國建築獨立非執行董事。中國建築接過唔少地鐵工程，亦都話過準備好為高鐵等大型基建服務。
高鐵隧道會經過大角嘴舊樓地層，最近搞到班老業主好閉翳，批評政府收收埋埋，佢哋唔睇報紙都唔知高鐵會經過，怕會拖累樓價，冇人肯收樓重建。其實受影響嘅唔止大角嘴，好似葵涌好多工業大廈，都面對同樣問題。
今年1月先落任嘅前行會成員羅仲榮，佢喺葵榮路30號有座金山工業中心，座落於高鐵沿線。不過羅仲榮走得快好世界，今年5月將幢工廈以1.55億賣咗出去，再向業主租返，唔使成為高鐵苦主。有人質疑點解金山集團會咁醒目，及時將物業脫手？
金山集團就回覆八方話，佢哋早喺2008年中已經計劃出售金山工業中心，同年10月至11月放盤，強調公司當時完全唔知高鐵走線。佢哋喺今年5月21日同買家簽咗臨時合約，到咗5月26日，先接獲路政署鐵路拓展處嘅信件，話畀佢哋聽高鐵走線嘅詳情。

mailto:[email protected]