車路士周六同曼城硬撼前，領隊干地識英雄重英雄，讚到對方主帥哥迪奧拿誇啦啦！

車仔目前落後曼城三分，但只要今場直接擊敗對方，就可以追至同分。雖然有主場之利，但見曼城六場英超入21球，干地賽前就話，其實自己啲戰術，都係被哥迪奧拿嘅進攻足球所啟發。

「我好尊重Pep（哥迪奧拿），我覺得佢係當今最佳領隊，好鍾意睇佢帶隊嘅比賽。」干地繼續透露自己點學對方：「每位教頭都會不斷接受新資訊或新思維，然後將呢啲新元素同自己本身嗰一套結合。大家都知道哥迪奧拿好鍾意佢隊波控制比賽，要佔有控球率同埋不斷創造機會去入波，所以你會發現好多創造型或技術型球員喺曼城，呢啲都係啟發緊我嘅戰術思維。」

對於阿古路因為去荷蘭睇演唱會時發生交通意外而受傷，冇緣呢場車城戰，干地就有咁嘅睇法：「我以前都係球員，如果周中放假，都要有少少責任感，去揀啲對自己、球隊或球會最有益嘅決定。我相信我啲球員已經唔係細路，佢哋都好大個，已經有家室同仔女，所以佢哋會有責任心。」