雖然近期冇乜勁爆韓劇出現，不過唔少劇迷依然鍾情追看韓劇，當中各大電視台亦密密開拍新劇。

好似今日SBS方面就宣佈新劇《再次相逢的世界》已落實由李沇熹、呂珍九及安宰賢主演，劇集將於大後日開拍，聽日進行讀劇本綵排。呢齣新劇又再玩「姊弟戀」橋段，呂珍九喺劇中會飾演一名19歲少年，並戀上31歲嘅護士李沇熹，人夫安宰賢則飾演餐廳老闆，三人喺劇中將展開三角戀，預計下月接擋池昌旭嘅《奇怪的搭檔》播出。而現實生活中，李沇熹現年29歲，呂珍九則同劇中一樣係19歲。

至於MBC方面，亦落實由韓藝瑟及金基石主演新劇《非欲望都市》，劇集將於8月開拍，故事係圍繞35歲未婚女性嘅戀愛及友情故事，劇集預計9月播出。

另外，現時正在拍攝嘅KBS《學校2017》，兩位主角金世正及張東尹近日就被拍得街頭開工嘅照片，兩人更穿上校服進行拍照，劇中金世正飾演夢想同已經考上大學嘅初戀男友一齊入同一間大學，點知因為佢成績太差，有意通過自己嘅漫畫令自己成功入大學，但卻被大家視為不良學生。