大家記唔記得邊個係柏歷堅奴？答案係千禧年頭嘅華倫西亞中堅，係賓尼迪斯愛將，之後仲帶過佢去利物浦。原來呢位前阿根廷國腳剛季教緊艾拉維斯，而新球季佢將會重返英超，執教修咸頓並簽約三年！

修咸頓辭退法國籍領隊佩爾後，搵黎45歲嘅柏歷堅奴頂替。剛季柏帥帶領艾拉維斯爆冷殺入西班牙盃決賽，雖然輸畀巴塞隆拿，不過亦令到艾拉維斯事隔十幾年後首次重返歐洲賽場，可以踢歐霸盃。

之前修咸頓曾經搵過阿根廷後衛出身、又喺西甲教波教得唔錯嘅普捷天奴執教，未知今次係咪食過翻尋味。

另一隊未有領隊嘅英超球隊水晶宮，睇黎同前荷蘭國腳法蘭迪保亞好事近，因為佢大佬朗奴迪保亞爆響口，話細佬只差些少細節就完成同水晶宮嘅談判。