肯雅徐徐濠縈今年繼續參加渣打全馬，佢話自己計出嘅時間係3小時52分鐘，比上年慢咗兩分鐘，阿徐不諱言係有少少失望:「可能係天氣問題，濕度高咗，我又流咗太多汗，同埋我有個壞習慣改唔到，就係中途一定要去廁所。頭先跑咗2、30公里去洗手間，一踎低就抽筋，我覺得體能需要再弗啲。」

今年嘅農曆新年，阿徐表示會到日本跑東京馬拉松，阿臣陳奕迅同女兒都會去，林海峰亦會參賽。今次阿徐都係跑全馬，喺咁短時間內參加兩次全馬，肯雅徐果然名不虛傳，佢話最希望今次東京馬拉松可以破到自己嘅最佳時間，就係3小時50分。

但係東京依家好凍，仲會落雪喎，阿徐笑言:「唔驚，我好鍾意凍，因為我好怕熱，平時跑都背心bratop，因為我feel到自己多汗。」阿徐又話，頭先跑嗰陣路上好多人為佢加油，但佢就只係對自己有一個要求，就係有進步。