【人類總是......】「坤哥潮語錄」最新力作 喺fb問網民:激光叫視點睇
眼鏡激光矯視吳業坤坤哥潮語錄
喺頒獎禮上攞獎都唔夠,喊到眼鏡出霧氣、又激凸咁,真係導演度好橋都未必做到;
明明喺社交平台上個po,講吓近況,啲「坤哥潮語錄」可以被人推到上報嘅……非坤莫屬。
繼「食好西」、「海車雞」、「兩隻wife」同「「有無d停車場係免費或者女平㗎」(新聞連結: http://bit.ly/2pNVREH )後,今日又嚟一單。
坤哥喺facebook問網民「激光叫視點睇」,由於個po係桃紅底襯白字,成件事,真係好搶眼!更搶嘅係,「激光叫視」……講緊乜呢?
再跟番「坤哥潮語錄」啲邏輯嚟推算,應該係講緊「激光矯視」,哦,咁就明晒!
正就正在,啲網民都自動tune到個台,明坤哥講乜,有開口叫坤哥改字嘅人,一隻手數得出。至於就坤哥個議題表態嘅,大部分人都覺得坤哥戴眼鏡好啲,仲話坤哥「副眼鏡係吉祥物,唔帶(戴)好似無咗個特別咁」,但亦有人贊成佢先做矯視,再戴番副平光眼鏡「保形象」。
其實坤哥會唔會考慮吓將自己啲潮語錄輯錄成書,可能有巿場嘅。
By the way,「激光叫視點睇」?咪用眼睇囉……