我有個客好誇張，唔係好與壞嘅問題，而係個老闆嘅偏執問題，因為佢公司好信奉性格測試呢一環。性格測試對我嚟講並唔陌生，曾幾何時去見工都遇過，對方仲係完成咗first interview之後用電郵send畀我作答，喺度公開部份問題。

我喜歡擁有決策權。

我喜歡與團隊緊密合作。

我樂於嘗試新事物及改善工作方式。

我喜歡節奏快的工作。

點解唔係用問號？因為佢唔需要你作文，只係填數目字，1係代表冇興趣唔鍾意，10係代表超有興趣超鍾意，好似你打完客戶服務熱線之後，個死人錄音會叫你幫CS畀分，而你又例牌會「啪」一聲收線嗰種呢！
以上五條問題只係其中一組，另外仲有十組，不過都係轉個形式問返差唔多嘅嘢，出題嘅人唔係有語障或者精神錯亂，只係用一種重複嘅方式「Chok」緊你有冇講大話。

認真講句，性格測試一定有佢嘅作用，但啲公司將佢嘅重要性擺到幾高，呢個就係另一個層面嘅問題，我咪話有個客好誇張嘅？因為佢哋決定請一個人嗰陣，interview過程同履歷只係佔兩成，另外八成係睇個性格測試結果。

呢個客只係中小企，做睡衣，加埋得30人左右，曾經有個求職者嚟自呢個行頭最Top嘅公司，佢無論係interview表現、過往工作經驗、語文能力、學位，同埋溝通技巧都係超晒班，點知最後都衰喺呢個test手上。

個性格測試滿分係100分，個求職者攞咗80分都唔請，HR話老闆要求有85分，因為80分依然反映個求職者喺某方面會處理得唔好，有機會喺工作上犯錯。

我尊重性格測試起到嘅作用，但係一個有血有肉嘅人，做嘢點會唔犯錯？機械人倒模式作業都會偶然故障啦！

無論我花幾多唇舌都幫唔到呢位求職者，而呢個空缺亦懸空咗一年以上，合理吖。

專欄作者簡介：
辦公室日報　聶瞳
記者出身，後脫離傳媒行業，誤打誤撞加入獵頭公司，幫人搵工，間接令一個家庭得到溫飽，因而成為我的第二人生。

Facebook專頁：
https://www.facebook.com/officedaily/

發掘更多身邊的小城故事，請LIKE 蘋地 Facebook Page，並設定為「搶先看」：
https://www.fb.com/appledailyland