「如何，在你心窗一角，濛濛呈現我的愛」就算唔記得呢首歌叫咩名，下一句「縱是驟睛驟雨，儘管昏昏暗」你都應該識得駁落去啩！呢首係Raidas嘅《傾心》，仲有傳係陳德彰用嚟追周慧敏㗎㖭！

Raidas係香港80年代玩電子風格為主嘅樂隊之一，有兩名成員陳德彰同黃耀光，雖然有名「影子成員」蔣志光，不過為人熟悉嘅都係陳、黃二人。經典作品有《吸煙的女人》、《別人的歌》、先前提到嘅《傾心》，同埋近排《春嬌救志明》唱番起嘅《傳說》。

《吸煙的女人》、《傳說》、《危險遊戲》《某月某日》等歌曲都係搶耳嘅電子舞曲風格，o依家聽番都會跟住郁；除咗「好揈」嘅歌曲，Raidas仲有《傾心》、《別人的歌》、《午夜放送》等嘅抒情Ballad，對曾為酒廊歌手嘅陳德彰可以話係度身訂造。

就咁數都數咗7首歌出嚟，其實Raidas仲有好多歌o依家聽番都好有玩味，大家聽完楊千嬅翻唱《傳說》之外，不妨搵番其他Raidas嘅滄海遺珠嚟聽吓！