中環舊天星碼頭已經圍起竹棚、木板同鐵架，聽聞政府會喺呢個星期開始拆卸鐘樓。呢個鐘樓係好多港人嘅集體回憶，曾經借美國紐約911世貿遇襲嘅景象，設計出具爭議性嘅反吸煙海報嘅本港平面及產品設計師余奉祖（Michael）都有感而發，最近特別設計咗一幅名為「TIMETOSTOP」的海報作品（圖），希望可以成功勸服政府保留鐘樓。
海報上嘅鐘樓好似紐約世貿中心咁，同樣受到襲擊。Michael好感慨咁話，政府令一座又一座具文化歷史意義嘅建築物倒下來，同恐怖分子嘅行徑冇乜分別，政府係時候停止再摧毀具歷史價值嘅香港地標，而市民亦都係時候出聲阻止政府咁做。八方都好認同Michael嘅觀點，希望政府好好反思。