最近上過吳君如在有線電視的節目，君如第一句就問：「睇過你哋頭文字D個預告片，幾好喎，不過係咪就得咁多先？」咁梗係唔止咁多啦，我個個禮拜喺度寫專欄，叫人畀心機拍戲，如果係得咁多，我就真係可以收皮。
我相信君如係替好多觀眾問咗一個關鍵性問題，其實我自己都會問同樣問題。有時睇咗某部戲預告片，到入場觀看後發覺貨不對辦，真係就得咁多或者係少啲就更加吹漲。間中都會有啲咁嘅情況出現，所以我好佩服嗰啲剪預告片叻嘅人。

港產片大部份預告片都係導演剪，聽聞在荷里活是有專人負責，咁喺荷里活應該攞對襪都有個專人負責，唔係點會用咁多錢呀？通常剪預告片前一定有班三姑六婆意見多多，又話要跟個market，又要咁，又要咁，你叫佢剪就即刻唔見人。經過多次以上經歷，我有啲簡單啲嘅方法，首先要明白剪預告等於剪廣告，廣告嘅唯一目的係令消費者購買產品，內容不一定反映產品功效。這點要好清楚，所以首先將最好睇嘅鏡頭抽出，再想想用一個兩分鐘嘅講故事方法，重新再講一次，可以係一個鏡頭，可以係一百個，但係目的只有一個，就係吸引觀眾購票入場。我睇過一啲預告片，導演不斷重複話畀大家聽佢套戲拍得有幾靚，咁即係變相暴露咗冇內容，故事唔吸引。
近年有啲戲嘅預告甚至係拍電影前先拍，電影上映時不會出現預告裏的內容，所以方法各有不同，最緊要係大家夠openmind。唔好淨係剪兩個爆炸鏡頭就當預告。