喺韓國返嚟，家姐Ada同Ivy鬧我又嘥錢去旅行。兩個主婦唔抵得啫，佢哋一身兒女債。為免傷姊妹感情，向新雅文化董事總經理梁榮錝求助，睇吓有乜新書買嚟送畀姨甥仔女。梁總話，全球首本為兒童而設嘅中英文彩色電子書，噚日登陸香港，叫我去發佈會。
梁總話本電子書叫做《新雅電子小書包》，同iPad類似，但iPad係畀大人玩嘅，而《小書包》係為3至10歲小朋友而設。現場小朋友爭住睇，本書重600克，啲細佬攞住都可以跑嚟跑去。覺得個mon得8吋有啲細，但細路攞住又似乎啱啱好。部機得幾個掣，操作簡易。

內置40本中英文書

電子小書包內置40本中英文電子書，都有圖畫，又有人聲講古仔，部份仲有動畫，好似《醜小鴨》隻醜小鴨會破蛋而出等。以後仲可以去 http://www.ebookincolor.com畀錢下載更多新書。
我話擔心小朋友好易攞唔穩部機跌落地，梁總聽完將部機揼落地，嚇得我以為得罪咗梁總，原來佢示範部機係通過重摔測試，唔易跌爛。
LCD屏幕話就話冇咁傷眼，但睇得多都攰，研發嘅台灣天瀚科技總經理黃崑勝話，部機每20分鐘會溫馨提示，叫小朋友休息，而且電池只可用兩個鐘，要再叉電先睇得。部機又可以做mp3機或者電子相簿。
電子小書包喺4月23日世界閱讀日會公開發售，優惠價$1,488，梁總話淨係嗰40本書都總值$2,500啦，佢預計首年賣1萬部，遲啲考慮加入教科書㖭。詳情可電21593681。

電郵：mailto:[email protected]