恭喜發財，利是逗來。今日開始，三間發鈔銀行，滙豐、渣打、中銀香港，就會提供兌換新銀紙服務，畀市民封利是。

唔少人鍾意用新銀紙封利是，但由二○○六年開始，金管局已經提倡銀行用「迎新鈔」，即係保存十分良好嘅舊鈔，今年三間銀行提供嘅銀紙，有成45%係迎新鈔，證明大家都開始習慣用，環保吖嘛。

年年換新銀紙嗰朝，銀行都會排長龍，唔少都係婆仔。費清問吓婆仔同事林C9，使唔使晨咁早去排隊，但佢話自己未雨綢繆，早喺三個月前，已經將新淨嘅銀紙留起，儲儲吓，而家淨係廿蚊紙都有逾百張。

佢阿媽仲醒，每逢過年後都會向啲仔女「回收」利是，唔係獨吞，而係真金白銀換㗎，「如果夾埋有千幾蚊嘅，阿媽咪畀翻千幾蚊我哋囉」，而佢阿媽就留起回收番嚟嘅廿蚊紙、五十蚊紙，下年用嚟封利是。

費清好環保，收利是，唔使一定要新鈔，大封就得㗎喇。收到呀呵，林C9。

不過，費清唔介意銀紙新舊，收到利是已經好開心啦。

費清＃要生計，也要生活＃毋忘初衷