喺今早（6日）雨量幾大嘅情況下，今季第二次香港國際馬匹拍賣會嘅拍賣馬，首次逐批出嚟草地試跑露面，俾一眾潛在買家過吓眼先，而今周六（9日）先係拍賣馬正式試跑示範嘅日子；而唔少練馬師包括葉楚航、苗禮德等，都特登拎住望遠鏡，企喺欄邊睇，似乎都對呢批拍賣馬都幾有興趣。

於今早試跑15匹嘅拍賣馬入面，最受矚目嘅肯定Lot12，唔單止高級經理黎卓時點名讚過之外，血統上仲同身價1100萬嘅「電路一號」有關係，事關前駒母親係上年葉森打吡盟主「巨鷹拍翼」嘅姨媽，而「電路一號」就係「巨鷹拍翼」嘅同母馬，所以Lot12隨時有力挑戰「電路一號」1100萬嘅最高拍賣馬身價紀錄。

然而，2018香港國際馬匹拍賣會（6月），將於下周五（15號）晚上舉行。