正所謂「長江後浪推前浪」，新生代照計應該搵錢多過上一代，但現實世界未必係咁。美國皮尤慈善信託基金會（PewCharitableTrusts）調查顯示，經通脹調整後，美國男性收入比30年前少12.5%。有網友喺《MSN討論區》問：「點解會出現呢個情況？」
EnigmaticPumpkin埋怨：「幾十年嚟，美國女權運動鼓勵女性唔好成日喺屋企湊仔，應該返工𢱑銀，於是越嚟越多職業女性，佢哋少啲人工都肯做，搞到男人薪酬下降。咁都不特止，喺全球化大趨勢下，越嚟越多職位外判到海外，加上好多非法入境者爭飯食，令美國男人嘅收入大不如前。」
Deniseee就認為，「美國社會偏幫女性，例如70年代改革教育制度，將教學方法配合女孩子嘅天性，令女生得分高過男生，於是越嚟越多女性接受高等教育，同男人搶工做。」
調查發現，考慮到通脹因素，由於美國全職職業婦女由1974至2004年大幅增加，當地家庭總收入喺呢段期間有所上升。不過，美國30幾歲嘅男性當年平均年薪有4萬美元（約31.2萬港元），家陣只得3.5萬美元，足足少咗12.5%。相反，喺1994年，美國30幾歲男性嘅收入比爸爸多5%。