(新增影片)《不懂撒嬌的女人》除咗可以睇女人撒嬌之外，仲可以睇到絕情同賤，講緊嘅就係宣萱演嘅Mall姐，同埋黎諾懿演嘅賤Han，今集真係睇到火都嚟啊！

今集先講Mall姐請賤Han返嚟公司做，仲要同唐詩詠同組，曾經被賤Han拋棄嘅唐詩詠除咗要對住仇人之外，仲要被賤Han偷橋。但賤Han做嘅嘢又點只咁簡單，賤Han又偷食咗唐詩詠整被王浩信嘅愛心飯盒，本身王浩信都好忍得，但佢哋兩個男人去到廁所，賤Han同王浩信講今次返嚟公司，主要係為咗唐詩詠，又出手打王浩信，仲屈埋對方出手。

賤Han做嘅賤事真係一浪接一浪，專登留單獨唐詩詠開會開到勁夜，仲出口錫唐詩詠，好彩王浩信即刻帶埋賤Han媽媽嚟到，先阻到呢件事，如果唔係都唔知點算。

除咗睇賤Han，今集另一個睇頭就係Mall姐有幾絕情同不擇手段，好似佢請賤Han返嚟呢件事，佢係呃咗唐詩詠，本身Mall姐係話唔請，但因為佢好鍾意賤Han做嘢不擇手段，所以請佢返嚟幫手對付林文龍，之但係完全冇理唐詩詠感受囉。到咗賤Han屈王浩信打佢，Mall姐仲企晒喺賤Han嗰邊，去到完嗰刻仲話要炒咗王浩信，真係好絕情。