公民黨立法會議員譚文豪（Jeremy）係飛機師，航空知識犀利係人都知，但就連佢咁有航空根基嘅人，近日都竟然要「進修」駕駛飛機知識，仲要喺前特首梁振英著名飯局景點、流浮山小桃源酒家外打卡，所為何事？

八方問過Jeremy，原來佢呢次係去學駕駛無人機嘅知識，報讀咗一個4天課程，希望學識駕駛無人機後，可以喺立法會稍後為無人機立法時，結合自己嘅飛機師同無人機操作員知識，提供更多有用意見，「咁就可以雙劍合璧嘞！」揸開民航機嘅Jeremy話，無人機雖然一定較容易上手，但要駕駛得好，並唔容易，「易學難精」。一向有「考牌癮」、擁有多個交通工具駕駛執照嘅Jeremy仲話，希望今年抽到時間去澳洲民航處報讀課程，正式考返個無人機飛機師執照，咁就可以比較外國課程同香港有乜分別。

至於點解會喺小桃源酒家外打卡，Jeremy話今日係自己第一次路過呢個689著名飯局景點，笑言自己「唔敢入去」，無幫襯喎。